Thursday, September 26, 2013

ငှက်ကလေး သို့ ......

ငှက်ကလေးရေ .....
အသံသာတဲ့ ကိုယ့်ရဲ့ ငှက်ကလေးရေ .....
အိပ်မောကျနေပြီလားကွယ် .....
ကောင်းသောညလေး  ဖြစ်ပါစေလို့
ငှက်ကလေးအတွက်  ကိုယ်ဆန္ဒပြုမိပါရဲ့.....
ဒီနေ့လဲ ကိုယ့်ကို  နှုတ်မဆက်ပဲ
ငှက်ကလေး  အိပ်မောကျသွားပြန်ပြီနော် .....

မီးစိမ်း နဲ့ မီးဝါလေးရဲ့ 
အကူးအပြောင်းမှာ 
ကိုယ် မှင်သက်မိနေတုန်း
အမှောင်နက်နက် အလင်းလဲ့လဲ့
မြင်ကွင်း တစ်ချို့ဟာ
ငှက်ကလေးရဲ့ အိမ်ပြတင်းက
စီးဆင်းနေကျ  ညခင်းတခုလို .....

လက်ပြ နှုတ်ဆက်ခွင့်ရှိရဲ့လား ?
ကိုယ် ရောက်ကန်းမတက်ချင်ပါဘူး .....
အိပ်မက်လှလှ  မက်စေဖို့သာ
အသံတိတ်  ဆုတောင်းပေးနေမိခဲ့တာ
ရင်ထဲမှာ လစ်ဟာသွားတဲ့  ဝေဒနာ
ကြေငြာစရာမလိုပဲ
အိမ်ပြန်လမ်းလေးက  သိတယ် ......
အကြောင်းပြချက် မရှိပဲ
ငှက်ကလေးနဲ့  ဝေးခဲ့ရတဲ့ ညဟာ
ကိုယ့် အတွက်တော့
ဒီဇင်ဘာကို  အာတိတ်သမုဒ္ဒရာထဲ
ပစ်ချခံလိုက်ရတဲ့  ညပဲ ......

ငှက်ကလေးရယ် ........
ကိုယ်ဟာ အစွဲလန်းကြီးသူတစ်ယောက် 
မဟုတ်ခဲ့ပါဘူး ...........
ငှက်ကလေးနဲ့  ပတ်သက်ရင်  အရာရာကို
စွဲစွဲလန်းလန်း  ရှိနေခဲ့တာလေး  တခုရယ် .......

ကိုယ့် ချစ်သူနဲ့  လမ်းခွဲပြီးကတည်းက
ဘယ်လို အသဲကွဲဇာတ်လမ်းမျိုးကိုမှ
ကိုယ် မဖတ်ချင်တော့တာ ......
ကြည့်မိတိုင်း  မျက်ရည်ကျရတဲ့
ဘယ်လို အလွမ်းဇာတ်သိမ်းမျိုးကိုမှ
ကိုယ် မခံစားနိုင်တော့တာ .......

အသဲငယ်တတ်သူရယ်လို့  ကိုယ့်ကို 
ငှက်ကလေး  ပြက်ရယ်ပြုချင် ပြုနေမယ် ......
ကိုယ့်မှာတော့  ခဲမှန်ဖူးတဲ့  စာသူငယ်မို့
တခါသေဖူး ပျဉ်ဖိုးနားလည်နေမိတဲ့ အဖြစ်ရယ်ပါ......

စာနာတတ်မယ်ဆို  ကိုယ့်ဘက်ကို
တခါလောက်ပဲ ငှက်ကလေး ငဲ့ကြည့်ပေးပါ .....
အလွမ်းတွေ  နင့်နေတဲ့  အချစ်ဘူတာမှာ
မျှော်လင့်ခြင်းရထားလေး  ဆိုက်ကပ်နေတာ
ငှက်ကလေးတစ်ယောက် ကြည့်တတ်ရင် မြင်မှာပါ ......

ငှက်ကလေး  သိလား ?
ကိုယ်ဟာ  ပရဟိတထက်
အတ္တဟိတကိုသာ  ဦးစားပေးခဲ့သူ .....
ဒီအသက် ဒီအရွယ်အထိ
ကိုယ့် ကိုယ်ကျိုးတစ်ခုထဲကိုသာ
ရှေးရှုပြီး  ရှင်သန်နေထိုင်ခဲ့တဲ့သူ .......

အခုတော့ ကိုယ်ဟာ
ကိုယ်ချင်းစာခြင်း တရားကို
ကိုယ့် နှလုံးအိမ်အတွင်းမှာ
လမ်းပြအလင်းရောင်လို  ချိတ်ဆွဲလို့ .....
ရို့ကျိုးခြင်း ဆိုတဲ့  ဂါရ၀တရားကို
ကိုယ့် နှလုံးသားရင်ပြင်မှာ
ကျေကျေနပ်နပ်ကြီး  ထွန်ယက်လို့ .......

ကိုယ်ဟာ စကားလုံးတွေနဲ့
ဖွင့်ဟ ပြောပြစရာမလိုပဲ
ငှက်ကလေး  ရင်ထဲက  ဆန္ဒတွေကို 
အလိုအလျောက်  သိမြင်နားလည်နိုင်ခဲ့တဲ့သူ .....
ကိုယ်ဟာ ငှက်ကလေးနှုတ်က 
တကူးတက  ဆုံးမစရာမလိုပဲ
အကြည့် တစ်ချက်နဲ့တင်
ငှက်ကလေး  အလိုကျ
ကိုယ့်ဘ၀ကို  ပဲ့ပြင်နေထိုင်ခဲ့တဲ့သူ ......

ကိုယ်ထင်တယ်လေ ......
ငှက်ကလေးသာ ကိုယ့်အနား ရှိခဲ့မယ်ဆို
ဘယ်လို  ခေတ်ပေါ်  အီလက်ထရောနစ်
ပစ္စည်းမျိုးကိုမှ ကိုယ်မလိုချင်တော့ဘူး ......
သေချာပါတယ် ......
ဘယ်လိုအဆောင်အယောင် အခမ်းအနားမျိုးကိုမှ
ကိုယ် မမက်မောတော့ဘူး .......

တခါ တခါတော့လဲ
ငှက်ကလေး  ပြောပြောနေကျ
မြန်မာသံစဉ်  သီချင်းလေးတွေကို
နားထောင်ကြည့်မိချင်သား .....
ကြင်နာတတ်တဲ့  ငှက်ကလေးက
ကဗျာချိုချိုလေး  တစ်ပုဒ်လောက်
ကိုယ့်ကို  ရွတ်ပြပါလား ?

အို ......... ကိုယ်စိတ်ကူးယဉ်တာတွေ
များလွန်းသွားပြီထင်ရဲ့ ....
အလကားရတဲ့  စိတ်ကူးယဉ်ခွင့်အပေါ်မှာ
အုတ်မြစ်ချလို့  ကိုယ်ဟာ လေထဲ
တိုက်အိမ်ဆောက်နေမိသူပါကွယ် ....
တဆိတ်လောက် ..... ဟိုအဝေးတစ်နေရာကနေ
ကိုယ့်ကို  ငှက်ကလေး  လှောင်ပြောင်
ရယ်သွမ်းသွေးမနေဘူး  မဟုတ်လား ?

တခြားသူတွေအပေါ်မှာ  ကြင်နာတတ်သလောက်
ကိုယ့်အပေါ်မှာ  ငှက်ကလေးတစ်ယောက်
မကြင်နာတတ်တာ  ကိုယ်သိတယ် ......
အဲဒါဟာ ဘာကြောင့်လဲဆိုတဲ့  အဖြေကိုလဲ
ငှက်ကလေး ကိုယ်တိုင်ပဲ သိမယ် .......

ငှက်ကလေးရယ် .......
ရက်စက်တတ်သူလို့  ကိုယ် မစွပ်စွဲပါရစေနဲ့ .....
အသဲခွဲတတ်သူလို့လဲ ကိုယ် ကင်ပွန်းမတပ်ချင်ပါဘူးကွယ် .....
အဆင်ခြင်မဲ့တဲ့ ကိုယ့် နှုတ်ထွက် စကားတစ်ခွန်းကြောင့်
ငှက်ကလေးရဲ့  ဂုဏ်သိက္ခာတွေ
ညှိုးနွမ်းသွားမှာ  ကိုယ်စိုးတယ် .........
အလျှံတငြီးငြီး  တောက်ပနေတဲ့
ငှက်ကလေးရဲ့  အရှိန်အ၀ါတွေ
ယုတ်လျော့သွားမှာ  ကိုယ်ကြောက်တယ် ......

အချစ်ဟာ ကိုယ့်အတွက်
အမြဲစိမ်းသစ်တော .......
စိမ်းလန်းတဲ့  သူ့အသွင်အပြင်က
ရင်ကို  အေးမြစေပေမဲ့လို့
ရင်းနှီးမှု  တစုံတရာကိုတော့
ဘယ်သောအခါမှ  မပေးစွမ်းနိုင်ခဲ့ဘူး .......
အဲဒိလိုပဲ  ငှက်ကလေးဟာလဲ
ကိုယ့်အတွက်  အမြဲစိမ်းသစ်တော .......
အချစ် = ငှက်ကလေး = အမြဲစိမ်းသစ်တော
အဖြေရပြီးသား  ပုစ္ဆာတစ်ပုဒ်ကို
ထပ်ခါတလဲလဲ  မိုက်မိုက်မဲမဲ
တွက်ချက်နေမိသူဟာ  ကိုယ်ပေါ့ ......

ငှက်ကလေး သို့ .......
.............................
ငှက်ကလေး အတွက် .......
..............................
ငှက်ကလေး .................
.................................
.................................

နာရီလက်တံ တချက်ချက် မြည်သံကြားမှ
ပစ္စုပ္ပန်ဟာ စိတ်နဲ့ခန္ဓာမှာ ကပ်တယ် ......
ဟိုအဝေးဆီမှာ  မဟူရာညရဲ့
ရထားဥသြသံ  ခပ်သဲ့သဲ့ ........
အင်း ....... ဘာလိုလိုနဲ့  ဒီညလဲ
ငှက်ကလေးအတွက်  ကဗျာရေးရင်း
မိုးလင်းရအုံးတော့ပြန်မှာပဲ .............


( ဒီငှက်ကလေးသို့ ဆိုတဲ့ တမ်းချင်းပဲ ခေါ်မလား 
ကဗျာလို့ပဲ သတ်မှတ်မလား  အဲဒိ ပို့စ်လေးကို မိုးနတ် မရောက်တာကြာပြီဖြစ်တဲ့ ဘလော့ဝိုင်းထဲက စီနီယာ ဂျုနီယာ
မောင်နှမများအားလုံးအတွက် ရည်ရွယ်ပြီး တင်ပေးဖြစ်ပါတယ် ..... 
မိုးနတ် ဘလော့ဖက်ကို ခြေဦးမလှည့်ဖြစ်သေးတဲ့အတွက်တော့ 
ခွင့်လွှတ်ပေးကြပါရှင် ..... အားလုံးကပျောက်နေတယ်လို့ 
စီပုံးမှာရော ဖဘမှာတွေ့ရင်ရော သတိတရမေးကြတယ် ... 
အဲဒါကို မသိချင်ယောင်ဆောင်ပြီး ဖဘမှာပဲ 
လမ်းသလားနေပြီး ဘလော့ဖက်ကို မလာနိုင်တာကိုတော့ 
မျက်နှာပူပူနဲ့ပဲ တောင်းပန်ပါရစေ .... မိုးနတ် အလုပ်တွေ ဘယ်လိုမှမအားသလို ရှေ့လျှောက်ပြီးလဲ ဒိထက်ပို 
အလုပ်များရဖို့ ရှိပါတယ် .... နောက်ပြီး ဒီနှစ်မကုန်ခင် မိုးနတ်  ကြိုးစားပြီး ၀တ္ထုရှည်တစ်ပုဒ်ရေးဖို့ ရှိတယ် .... အဲဒါလဲ သိပ်ကို 
အာရုံထားပြီး ကြိုးစားနေတာမို့ နားချိန် အားချိန်
မရှိလောက်အောင်ပါပဲ ... သတင်းအဆက်အသွယ်
မပြတ်စေဖို့ရယ် .... အချိန်ကုန်သက်သာစေဖို့ရယ် ရည်ရွယ်ပြီး ဖဘကိုတော့ အမြဲဝင်ဖြစ်ပါတယ် ..... အဲဒါလေးကိုတော့
နားလည်ပေးစေချင်ပါတယ် ဘော်ဘော်တို့ရယ် ....
အားလုံးကို အရမ်းပဲ သတိတရရှိနေပါတယ် ... 
အဲ နောက်တော့လေ .... ပြောအုံးမလို့
ဒီ ငှက်ကလေးသို့ ဆိုတဲ့ ခေါင်းစဉ်နဲ့ အမရည်ဝေ ရေးဖြစ်တဲ့
ငှက်ကလေး စီးရီးလေးတွေ မှတ်မိကြအုံးမယ် ဖတ်ဖူးကြမယ်
ထင်ပါတယ် ..... ခု မိုးနတ်ကလဲ ငှက်ကလေးသို့ ဆိုတော့
အားလုံး မျက်စိလည်သွားမှာစိုးလို့ပါ .... ဒီကဗျာလေးကို
မိုးနတ်ရဲ့ တကောင်တည်းသော ငှက်ကလေးအတွက်
ရည်ရွယ်တာမို့ မမရည်ဝေကို ခွင့်တောင်းပြီးမှ
ငှက်ကလေး သို့ လို့ ခေါင်းစဉ်ပေးထားတာပါ ......
သူ့ကိုလဲ ငှက်ကလေးလို့ပဲ ရင်ထဲက မြတ်မြတ်နိုးနိုးခေါ်မိတာမို့
တခြားနာမ်စားလဲ မသုံးချင်တော့လို့ပါ ...... အဲဒါကြောင့်
အမရည်ဝေကို ခေါင်းစဉ်တူနေတဲ့အတွက် ခွင့်တောင်းပြီးမှ
ဒီကဗျာလေးကို ရေးဖြစ်ပါတယ် ................. အဲဒါလေးလဲ
ပြောပြချင်တာပါ ...... အားလုံးပဲ မိုးနတ်ရဲ့ ငှက်ကလေး သို့
ဆိုတဲ့ ပို့စ်လေးကို ဖတ်ပြီး တခုခုခံစားမိတယ်ဆိုရင်ဖြင့်
မိုးနတ် ရေးရကျိုးနပ်ပါပြီ ........................................... )

 အားလုံးကို သတိရနေတဲ့ 
 မိုးနတ်ကြယ်စင် 

12 comments:

  1. မိုးနတ်ရေ မတွေ့တာကြာပေါ့
    ရောက်လာတော့လည်း ကဗျာအရှည်ကြီးနဲ့ ရောက်လာတာပဲနော်
    အချစ် = ငှက်ကလေး = အမြဲစိမ်းသစ်တော တဲ့ :)
    ၀တ္ထုရှည်ကိုလဲ စောင့်ဖတ်နေမယ်နော်

    ReplyDelete
  2. ကဗျာရှည် ဖတ်သွား၏ ။ FB ကို သုံးဖြစ်ပေမယ့် ... Blogging ကို ပိုမို နှစ်သက်ပါကြောင်း ... :)

    ReplyDelete
  3. ဝိုး.. သူပေါ်လာပြီ။ ကဗျာရှည်လေး ဖတ်သွားတယ်။ ၀တ္တုရှည်လေးလည်း စောင့်ဖတ်နေမယ် sis ရေ.. :)

    ReplyDelete
  4. မိုက်ပါ၏

    မိန်းကလေးတော်တော်များများက ချစ်သူကို ငှက်ကလေးလို့ သုံးနေကြသလား
    စဉ်းစားမိသွားတယ် ချစ်သူကို ငှက်ကလေးလို့ သုံးတဲ့ မိန်းကလေးရဲ့ အချစ်ကိုလည်း ကိုယ်ချင်းစာမိ
    ကိုယ့်ချစ်သူကို လွတ်လွတ်လပ်လပ် ဝေဟင်မှာ ပျံပါစေ ဆိုတဲ့ အဓီပ္ပါယ်နဲ့ ပေးခဲ့မိတာဆိုတော့း)

    ReplyDelete
  5. ကျွန်တော်လည်း မိန်းကလေး သူငယ်ချင်းတစ်ယောက်ကို အကောင်လေး နာမည်ခေါ်ခဲ့ဖူးတယ်.။ သူ့နာမည်ကတော့ ကဗျာမဆန်ဘူး.. တီကောင် တဲ့.. :D

    ReplyDelete
  6. မပေါ်လာအတော်ကြာပါပေါ့ ငှက်ကလေး အဲ ဟုတ်ပေါင်
    မမိုးနတ် :p

    ဆက်လက်ရေးသားနိုင်ပါစေဗျာ ...။

    ReplyDelete
  7. ငှက်ကလေး တမ်းချင်းအားရပါးရဖတ်သွားတယ်။ အားရပါးရရေးထားတာလေးဆိုတော့။ ညလေးရေ မတွေ့တာတော်တော်ကြာပီပဲ

    ReplyDelete
  8. မိုးနတ်ရေ...မတွေ့ တာကြာပေးမဲ့ ရင်ထဲမှာတော့သတိရနေပါတယ်...မမြင်တာကြာပေမဲ့
    အိမ်လေးကိုရောက်ရောက်လာမိနေဆဲပါ...ခင်တဲ့ရင်ခုန်....

    ReplyDelete
  9. နာရီလက်တံ တချက်ချက် မြည်သံကြားမှ
    ပစ္စုပ္ပန်ဟာ စိတ်နဲ့ခန္ဓာမှာ ကပ်တယ် ......
    ဟိုအဝေးဆီမှာ မဟူရာညရဲ့
    ရထားဥသြသံ ခပ်သဲ့သဲ့ ........
    အင်း ....... ဘာလိုလိုနဲ့ ဒီညလဲ
    ငှက်ကလေးအတွက် ကဗျာရေးရင်း
    မိုးလင်းရအုံးတော့ပြန်မှာပဲ...........................

    ReplyDelete
  10. အရမ်းကောင်းပါတယ်
    လေးစားတယ်ဗျာ

    ReplyDelete
  11. ကဗျာလေးကြိုက်လို့ copy ယူသွားပါသည် ကျေးဇူးတင်ပါသည်။

    ReplyDelete
  12. အရမ်းမိုက်​

    ReplyDelete

အားဆေးလေးတိုက်ခဲ့အုံးနော်....ဟိ